Ռուսաստանի Դաշնության վարչապետ Դմիտրի Մեդվեդևը հանձնարարել է ՌԴ գյուղատնտեսության նախարարության ղեկավար Դ.Պատրուշևին վերահսկել պարարտանյութերի շուկայում գների իրավիճակը, չնայած այն փաստին, որ այն այժմ կայուն է, հայտնում է «Ինտերֆաքսը»։
Կառավարության նիստի ժամանակ Մեդվեդևը հիշեցրել է, որ անցած տարի պարարտանյութ արտադրող խոշորագույն արտադրողների մասնակցությամբ հանդիպում է տեղի ունեցել, և հարցրել է՝ արդյոք այս շուկայում գների հետ կապված իրավիճակը այժմ բարվոք է։
«Իրավիճակը բավականին կայուն է, և գների կտրուկ թռիչքներ չկան, ընդ որում՝ գների թե՛ մեծածախ շուկայում, թե՛ ուղղակի սպառողների համար։ Ուստի իրավիճակը վերահսկելի է, եթե ինչ-որ բան դուրս գա իրավիճակի բնականոն զարգացումից, մենք կտեղեկացնենք»,- ի պատասխան ասել է Գյուղատնտեսության նախարարության ղեկավար Դմիտրի Պատրուշևը։
Ինչպես հանդիպման ժամանակ ասաց Պատրուշևը, սեպտեմբերի վերջի դրությամբ ֆերմերները ձեռք են բերել 3 մլն տոննա պարարտանյութ, ինչը գրեթե 400 հազար տոննայով ավելի է նախորդ տարվա նույն ժամանակահատվածի համեմատ։ Ընթացիկ տարում հանքային պարարտանյութերի կիրառման կանխատեսումը կազմում է 3,2 մլն տոննա, ինչը բարձր է նախորդ տարվա մակարդակից։
Անդրադառնալով ագրոարդյունաբերական համալիրի նյութատեխնիկական բազայի այլ բաղադրիչներին, մասնավորապես՝ գյուղատնտեսական տեխնիկայի, նախարարն ասաց, որ ֆերմերներն ունեն 564 հազարից ավելի մեքենա դաշտային աշխատանքներ իրականացնելու համար։ «Առաջին կիսամյակում ավելի շատ տեխնիկա է ձեռք բերվել, քան 2018 թվականի նույն ժամանակահատվածում»,- ասաց նա։ «Սա հնարավորություն տվեց գյուղատնտեսական կազմակերպությունների էներգամատակարարումը պահպանել նախորդ տարվա մակարդակին»։
Ավարտելով սեզոնային դաշտային աշխատանքների ռեսուրսների թեման՝ նախարարը տեղեկացրեց նաև, որ այս տարվա անցած ժամանակահատվածում գյուղ վառելիքի մատակարարման ընդհատումներ չեն եղել։ «Բերքահավաքի ընթացքում ֆերմերները լիովին ապահովված են վառելիքով աշխատանքի համար»,- ընդգծեց նա։ «Այժմ պահեստում ունեն ավելի քան 580 հազար տոննա դիզելային վառելիք և գրեթե 75 հազար տոննա բենզին»։
Նախարարի խոսքով՝ առկա ռեսուրսները թույլ կտան ոչ միայն հաջողությամբ ավարտել բերքահավաքը, այլև արդյունավետ իրականացնել ձմեռային բերքի ցանքը, «այսինքն՝ հիմք դնել 2020 թվականի բերքահավաքին»։ Նա տեղեկացրեց, որ այս տարի նախատեսվում է 17,5 մլն հա-ի վրա ձմեռային ցանքս կատարել, ինչը համապատասխանում է նախորդ տարվա ցուցանիշին։ Ձմեռացանի համար պատրաստվել է ավելի քան 3,7 մլն տոննա սերմացու, ինչը 2 տոկոսով ավելի է, քան անհրաժեշտությունը, հավելեց նա։
Source: http://agroobzor.ru/