Այս շաբաթ ռուս ֆերմերները հնարավորություն են ստացել թանկացնել սոխը, կարծում են EastFruit նախագծի վերլուծաբանները՝ վկայակոչելով շուկայի մասնակիցներին։
Այսօր հիմնական արտադրական շրջանների ռուսական գյուղացիական տնտեսությունները սոխն առաջարկում են 10-15 ռուբլի/կգ (0,16-0,23 դոլար/կգ) գնով, ինչը միջինը 11%-ով ավելի թանկ է, քան նախորդ աշխատանքային շաբաթվա վերջում։
Թանկացման պատճառը, շուկայի մասնակիցների կարծիքով, որակյալ սոխի խիստ սահմանափակ մատակարարումն էր, քանի որ գյուղացիական շատ տնտեսություններ շարունակում են ձեռնպահ մնալ պահեստային արտադրանքի իրացումից։ Ըստ մասնագետների՝ այս պահին վաճառքում է անորակ սոխը, որը պիտանի չէ երկարաժամկետ պահպանման համար։ Միաժամանակ, իրենք՝ ֆերմերները, նշում են, որ ընթացիկ սեզոնում անորակ ապրանքների տոկոսը բերքի մեջ նկատելիորեն աճել է։ Դա պայմանավորված է եղանակային անբարենպաստ պայմաններով եւ, մասնավորապես, սեպտեմբերին տեղացած հորդառատ անձրեւներով։ Արդյունքում բարձր խոնավության պատճառով մի շարք տնտեսություններում նկատվել են բակտերիալ հիվանդությունների հետ կապված խնդիրներ։
Նշենք, որ, չնայած թանկացումներին, ռուս ֆերմերները, այնուամենայնիվ, սոխը վաճառում են միջինը 13%-ով ավելի էժան, քան նախորդ տարվա նույն ժամանակահատվածում։ Միևնույն ժամանակ, շուկայի մասնակիցները հայտնում են, որ Ռուսաստանի Դաշնությունում սոխի թանկացումը կարող է ավելի սրընթաց լինել։ Սակայն գների վրա զգալի ճնշում է գործադրում ներկրվող էժան սոխի կայուն մատակարարումները, որոնք համակարգված կերպով ռուսական շուկա են բերվում Ղազախստանից։